సాధన పంచకమ్(ఉపదేశ పంచకమ్)

వేదో నిత్యమధీయతాం తదుదితం కర్మస్వనుష్ఠీయతాం తేనేశస్య విధీయతామపచితిః కామ్యే మతిస్త్వజ్యతామ్। పాపౌఘః పరిధూయతాం భవసుఖే దోషోఽనుసంధీయతాం ఆత్మేచ్ఛా వ్యవసీయతాం నిజగృహాత్ తూర్ణం వినిర్గమ్యతామ్॥1॥ సంగః సత్సు విధీయతాం భగవతో భక్తిర్దృఢా ధీయతాం శాంత్యాదిః పరిచీయతాం దృఢతరం కర్మాశు సంత్యజ్యతామ్। సద్విద్వానుపసర్ప్యతాం ప్రతిదినం తత్పాదుకా సేవ్యతాం బ్రహ్మైకాక్షరమర్థ్యతాం శ్రుతిశిరోవాక్యం సమాకర్ణ్యతామ్॥2॥ వాక్యార్థశ్చ విచార్యతాం శ్రుతిశిరః పక్షః సమాశ్రీయతామ్। దుస్తర్కాత్ సువిరమ్యతాం శ్రుతిమతస్తర్కోఽనుసంధీయతామ్। బ్రహ్మాస్మీతి విభావ్యతాం,అహరహర్గర్వః పరిత్యజ్యతాం దేహోఽహం మతిరుజ్ఘ్యతాం బుధజనైర్వాదః పరిత్యజ్యతామ్॥3॥ క్షుద్వ్యాధిశ్చ చికిత్స్యతాం ప్రతిదినం భిక్షౌషధం భుజ్యతాం స్వాద్వన్నం నతు యాచ్యతాం,విధివశాత్ ప్రాప్తేన సంతుష్యతామ్। శీతోష్ణాది విషహ్యతాం న తు వృథా వాక్యం సముచ్చార్యతాం ఔదాసీన్యమభీప్స్యతాం జనకృపానైష్ఠుర్య ముత్సృజ్యతామ్॥4॥ ఏకాంతే సుఖమాస్యతాం పరతరే చేతః సమాధీయతాం పూర్ణాత్మా సుసమీక్ష్యతాం జగదిదం తద్బాధితం దృశ్యతామ్। ప్రాక్కర్మప్రవిలాప్యతాం చితిబలాన్నాప్యుత్తరైః శ్లిష్యతాం ప్రారబ్ధం త్విహ భుజ్యతా మథ పరబ్రహ్మాత్మనా స్థీయతామ్॥5॥ యః శ్లోకపంచకమిదం పఠతే మనుష్యః సంచింతయత్యనుదినం స్థిరతా ముపేత్య। తస్యాశు సంసృతి దవానలతీవ్రఘోర తాపః ప్రశాంతి ముపయాతి చితిప్రసాదాత్॥ ఇతి శ్రీమచ్ఛంకరాచార్య విరచితం సాధన పంచకం సంపూర్ణమ్!!!!