శ్రీ మదాంజనేయ స్తోత్రమ్

ప్రసన్నాంగరాగం ప్రభాకాంచనాంగం జగద్భీతిశౌర్యం తుషారాద్రిధైర్యమ్। తృణీభూతహేతిం రణోద్యద్విభూతిం భజే వాయుపుత్రం పవిత్రాప్తమిత్రమ్॥1॥ భజే పావనం భావనానిత్యవాసం భజే బాలభాను ప్రభాచారుభాసమ్। భజే చంద్రికాకుంద మందారహాసం భజే సంతతం రామభూపాలదాసమ్॥2॥ భజే లక్ష్మణప్రాణ రక్షాతి దక్షం భజే తోషితానేక గీర్వాణపక్షమ్। భజే ఘోరసంగ్రామ సీమాహతాక్షం భజే రామనామాతి సంప్రాప్తరక్షమ్॥3॥ కృతాభీలనాదం క్షితిక్షిప్తపాదం ఘనక్రాంతభృంగం కటిస్థోరుజంఘమ్। వియద్వ్యాప్తకేశం భుజశ్లేషితాశ్మం జయశ్రీ సమేతం భజే రామదూతమ్॥4॥ చలద్వాలఘాతం భ్రమచ్తక్రవాళం కఠోరాట్టహాసం ప్రభిన్నాబ్దజాండమ్। మహాసింహనాదా ద్విశీర్ణత్రిలోకం భజే చాంజనేయం ప్రభుం వజ్రకాయమ్॥5॥ రణే భీషణే మేఘనాథే సనాథే సరోషే సమారోపితే మిత్రముఖ్యే। ఖగానాం ఘనానాం సురాణాం చ మార్గే నటంతం వహంతం హనూమంత మీడే॥6॥ కనద్రత్న జంభారి దంభోళిధారం కనద్దంతనిర్ధూతకాలోగ్రదంతమ్। పదాఘాతభీతాబ్ధి భూతాధివాసం రణక్షోణిదక్షం భజే పింగళాక్షమ్॥7॥ మహాగ్రాహపీడాం మహోత్పాతపీడాం మహారోగపీడాం మహాతీవ్రపీడామ్। హరత్యాశు తే పాదపద్మానురక్తో నమస్తే కపిశ్రేష్ఠ!రామప్రియోయః॥8॥ సుధాసింధుముల్లంఘ్య నాథోగ్రదీప్తః సుధాచౌషధీస్తాః ప్రగుప్తప్రభావః। క్షణద్రోణశైలస్య సారేణ సేతుం వినా భూః స్వయం కస్సమర్థః కపీంద్రః॥9॥ నిరాతంకమావిశ్వ లంకాం విశంకో భవానేవ సీతాతిశోకాపహారీ। సముద్రాంతరంగాది రౌద్రం వినిద్రం విలంఘ్యోరుదంఘస్తుతాఽమర్త్యసంఘః॥10॥ రమానాథరామః క్షమానాథ రామః అశోకేన శోకం విహాయ ప్రహర్షమ్। వనాంతర్ఘనం జీవనం దానవానాం విపాట్య ప్రహర్షాత్ హనూమాన్ త్వమేవ॥11॥ జరాభారతో భూరిపీడాం శరీరే నిరాధారణారూఢగాఢ ప్రతాపే। భవత్పాదభక్తిం భవద్భక్తిరక్తిం కురు శ్రీహనూమత్ప్రభో!మే దయాళో!॥12॥ మహాయోగినో బ్రహ్మరుద్రాదయో వా న జానంతి తత్త్వం నిజం రాఘవస్య। కథం జ్ఞాయతే మాదృశే నిత్యమేవ ప్రసీద ప్రభో!వానరేంద్రో నమస్తే॥13॥ నమస్తే మహాసత్త్వవాహాయ తుభ్యం నమస్తే మహావజ్ర దేహాయ తుభ్యమ్। నమస్తే పరీభూత సూర్యాయ తుభ్యం నమస్తే కృతాఽమర్త్య కార్యాయ తుభ్యమ్॥14॥ నమస్తే సదా బ్రహ్మచర్యాయ తుభ్యం నమస్తే సదా వాయుపుత్రాయ తుభ్యమ్। నమస్తే సదా పింగళాక్షాయ తుభ్యం నమస్తే సదా రామభక్తాయ తుభ్యమ్॥15॥ హనూమద్భుజంగ ప్రయాతం ప్రభాతే ప్రదోషేఽపి వా చార్థరాత్రేఽపి మర్త్యః। పఠన్నశ్నతోఽపి ప్రముక్తాఘజాలః సదా సర్వదా రామభక్తిం ప్రయాతి॥16॥ ఇతి శ్రీమచ్ఛంకరాచార్స విరచితం శ్రీ మదాంజనేయ భుజంగ ప్రయాతమ్!!!