అంబాష్టకమ్

చేటీ భవన్నిఖిల ఖేటీ కదంబ తరువాటీషు నాకిపటలీ కోటీర చారుతరకోటీ మణీకిరణ కోటీ కరంబిత పదా, పాటీర గంధకుచశాటీ కవిత్వ పరిపాటీ మగాధిపసుతా ఘోటీకులాదధికధాటీ ముదారముఖ వీటీర సేన తానుతామ్॥1॥ ద్వైపాయన ప్రభృతి శాపాయుధ త్రిదివ సోపాన ధూళిచరణా పాపాపహస్వమనుజాపాను లీనజనతాపాప నోదనిపుణా, నీపాలయా సురభిధూపాలకా దురిత కూపా దుదంచయతు మాం రూపాధికా శిఖరి భూపాల వంశమణి దీపాయితా భగవతీ॥2॥ యాలీభిరాత్మతనుతాలీ సకృత్ప్రియకపాలీషు ఖేలతి భయ వ్యాలీ నకుల్యసిత చూలీభరా చరణధూళీల సన్మునివరా, బాలీ భృతి శ్రవసి తాలీదలం వహతి యాలీక శోభితిలకా సాలీకరోతు మమకాలీ మనః స్వపదనాలీక సేవన విధౌ॥3॥ కూలాతి గామిభయ తూలా వలిజ్వలనకీలా నిజస్తుతి విధా కోలాహల క్షపిత కాలామరీ కుశల కీలాల పోషణనభాః, స్థూలాకుచే జలదనీలా కచే కలితలీలా కదంబ విపినే శూలాయుథ ప్రణతి శీలా విభాతు హృది శైలాథిరాజతనయా॥4॥ కుంబావతీ సమవిడంబాగలేన నవతుంబా భవీణ సవిధా శంబాహులేయ శశిబింబాభిరామ ముఖసంబాధితస్తనభరా, అంబా కురంగమదజంబాల రోచిరిహ లంబాలకా దిశతు మే బింబాధరా వినతశంబాయుధాదినకురంబా కదంబవిపినే॥5॥ న్యం కాకరే వపుషి కంకాది రక్తపుషి కంకాది పక్షి విషయే త్వంకామనామయసి కిం కారణం హృదయ పంకారి మేహి గిరిజామ్, శంకాశిలా నిశిత టంకాయ మానపద సంకాశమాన సుమనో ఝంకారి మానతతిమంకానుపేత శశిసంకాశి వక్తృకమలామ్॥6॥ యత్రశయో లగతి తత్రాగజా వసతు కుత్రాపి నిస్తుల శుకా సుత్రామకాల ముఖ సత్రాశన ప్రకరసుత్రాణకారి చరణా, ఛత్రానిలాతి రయపత్రాభిరామగుణ మిత్రామరీ సమవధూః కుత్రాసహన్మణి విచిత్రాకృతిః స్ఫురిత పుత్రాది దాన నిపుణా॥7॥ ఇంధాన కీరమణిబంధా భవే హృదయ బంధావతీవ రసికా సంధావతీ భువన సంధారణేఽప్య మృతసింధావుదార నిలయా, గంధానుభాను ముహరంధాలి వీత కచబంధా సమర్పయతు మే శంధామ భానుమపి సంధానమాశు పదసంధాన మప్యగ సుతా॥8॥ ఇతి శ్రీమచ్ఛంకరాచార్యవిరచిత మంబాష్టకం సంపూర్ణమ్

శ్రీ శివనామావళ్యష్టకమ్

హే చంద్రచూడ,మదనాంతక,శూలపాణే, స్థాణో,గిరీశ,గిరిజేశ,మహేశ,శంభో! భూతేశ,భీత భయసూదన,మామనాథం, సంసార దుఃఖ గహనాజ్జగదీశ!రక్ష॥1॥ హే పార్వతీ హృదయవల్లభ,చంద్రమౌళే, భూతాధిప,ప్రమథనాథ,గిరీశచాప! హే వాసుదేవ,భవ,రుద్ర,పినాకపాణే! సంసార దుఃఖ గహనాజ్జగదీశ!రక్ష॥2॥ హే నీలకంఠ,వృషభధ్వజ,పంచవక్త్ర లోకేశ,శేష వలయ,ప్రమథేశ,శర్వ! హే ధూర్జటే,పశుపతే,గిరిజాపతే,మాం సంసార దుఃఖ గహనాజ్జగదీశ!రక్ష॥3॥ హే విశ్వనాథ,శివ,శంకర,దేవదేవ, గంగాధర,ప్రమథనాయక,కృత్తివాసః బాణేశ్వరాంధక రిపో,హర!లోకనాథ! సంసార దుఃఖ గహనాజ్జగదీశ!రక్ష॥4॥ వారాణసీపురపతే,మణికర్ణికేశ, వీరేశ,దక్షమఖకాల,విభో,గణేశ! సర్వజ్ఞ,సర్వహృదయైక నివాస!నాథ, సంసార దుఃఖ గహనాజ్జగదీశ!రక్ష॥5॥ శ్రీమన్మహేశ్వర,కృపామయ,హే దయాళో! హే వ్యోమకేశ,శితికంఠ,గణాధినాథ, భస్మాంగరాగ,నృకపాల కలాపమాల, సంసార దుఃఖ గహనాజ్జగదీశ!రక్ష॥6॥ కైలాస శైల వినివాస,వృషాకపే,హే మృత్యుంజయ,త్రినయన,త్రిజగన్నివాస! నారాయణ ప్రియ,మదాపహ,శక్తినాథ! సంసార దుఃఖ గహనాజ్జగదీశ!రక్ష॥7॥ విశ్వేశ,విశ్వభవనాశక,విశ్వరూప, విశ్వాత్మక,త్రిభువనైక గుణాఖిలేశ! హే విశ్వరూప!కరుణామయ,దీనబంధో, సంసార దుఃఖ గహనాజ్జగదీశ!రక్ష॥8॥ ఇతి శ్రీ శివనామావళ్యష్టకమ్ సంపూర్ణమ్.

శ్రీ రుద్రాష్టకమ్

నమామీశమీశాన నిర్వాణరూపం విభుం వ్యాపకం బ్రహ్మ వేద స్వరూపమ్, నిజం నిర్గుణం నిర్వికల్పం నిరీహం చిదాకాశ మాకాశవాసం భజేఽహమ్॥1॥ నిరాకార మోంకార మూలం తురీయం గిరా జ్ఞాన గోఽతీత మీశం గిరీశమ్, కరాళం మహాకాలకాలం కృపాళుం గుణాగార సంసారపారం నతోఽహమ్॥2॥ తుషారాద్రి సంకాశగౌరం గభీరం మనోభూత కోటి ప్రభాశ్రీ శరీరమ్, స్ఫురన్మౌళి కల్లోలినీ చారుగంగా లసత్ ఫాల బాలేందు కంఠే భుజంగా॥3॥ చలత్ కుండలమ్ ,భ్రూసునేత్రం విశాలం ప్రసన్నాననం నీలకంఠం దయాళుమ్, మృగాధీశ చర్మాంబరం రుండమాలం ప్రియం శంకరం సర్వనాథం భజామి॥4॥ ప్రచండం ప్రకృష్టం,ప్రగల్భం,పరేశం అఖండం అజం భానుకోటి ప్రకాశమ్, త్రయశ్శూల నిర్మూలనం,శూలపాణిం భజేఽహం భవానీపతిం భావగమ్యమ్॥5॥ కళాతీత కల్యాణ కల్పాంత కారీ సదా సజ్జనానందదాతా పురారీ, చిదానంద సందోహ మోహాపహారీ ప్రసీద ప్రసీద ప్రభో!మన్మథారీ॥6॥ న యావత్ ఉమానాథ పాదారవిందం భజంతీహ లోకే పరే వా నరాణామ్, న తావత్ సుఖం శాంతి సంతాపనాశం ప్రసీద ప్రభో!సర్వభూతాధివాసమ్॥7॥ న జానామి యోగం జపం నైవ పూజాం నతోఽహం సదా సర్వదా శంభు!తుభ్యమ్, జరాజన్మదుఃఖౌ ఘతాతప్యమానం ప్రభో!పాహి ఆపన్న మా మీశ శంభో!॥8॥ రుద్రాష్టకమిదం ప్రోక్తం విప్రేణ హరతోషయే, యే పఠంతి నరా భక్త్యా తేషాం శంభూః ప్రసీదతి. ఇతి శ్రీరుద్రాష్టకం సంపూర్ణమ్

గణేశ మంగళాష్టకమ్

గజాననాయ గాంగేయ సహజాయ సదాత్మనే, గౌరీప్రియ తనూజాయ గణేశాయాస్తు మంగళమ్॥ నాగయజ్ఞోపవీతాయ నతవిఘ్నవినాశినే, నంద్యాది గణనాథాయ నాయకాయాస్తు మంగళమ్॥ ఇభవక్తాృయ చేంద్రాది వందితాయ చిదాత్మనే, ఈశానప్రేమపాత్రాయ చేష్టదాయాస్తు మంగళమ్॥ సుముఖాయ సుశుండాగ్రోత్ క్షిప్తామృతఘటాయ చ, సురబృంద నిషేవ్యాయ సుఖదాయాస్తు మంగళమ్॥ చతుర్భుజాయ చంద్రార్ధ విలసన్మస్తకాయ చ, చరణావనతానంత తారణాయాస్తు మంగళమ్॥ వక్రతుండాయ వటవే వన్యాయ వరదాయ చ, విరూపాక్ష సుతాయాస్తు విఘ్ననాశాయ మంగళమ్॥ ప్రమోదామోదరూపాయ సిద్ధివిజ్ఞానరూపిణే, ప్రకృష్ట పాపనాశాయ ఫలదాయాస్తు మంగళమ్॥ మంగళం గణనాథాయ మంగళం హరసూనవే, మంగళం విఘ్నరాజాయ విఘ్నహర్తేృఽస్తు మంగళమ్॥ శ్లోకాష్టకమిదం పుణ్యం మంగళప్రద మాదరాత్, పఠితవ్యం ప్రయత్నేన సర్వవిఘ్ననివృత్తయే॥ ఇతి శ్రీ గణేశ మంగళాష్టకమ్ సంపూర్ణమ్

విఘ్నేశ్వర నమస్కారస్తోత్రము

జయ విఘ్నేశ్వర!నమో నమో,జగద్రక్షకా!నమోనమో, జయకర !శుభకర!సర్వపరాత్పర!జగదుద్థారా!నమోనమో॥ మూషికవాహన!నమోనమో,మునిజనవందిత!నమోనమో, మాయారాక్షసమదాపహరణా!మన్మథారిసుత!నమోనమో॥జయ॥ విద్యాదాయక!నమోనమో,విఘ్నవిదారక!నమోనమో, విశ్వసృష్టిలయకారణ శంభో!విమలచరిత్రా!నమోనమో॥జయ॥ గౌరీప్రియసుత!నమోనమో,గంగానందన!నమోనమో, గంధర్వాద్భుతగైనవినోదా!గణపతిదేవా!నమోనమో॥జయ॥ నిత్యానందా!నమోనమో,నిజఫలదాయక!నమోనమో, నిర్మలపురవర!నిత్యమహోత్సవ!రామనాథనుత!నమోనమో॥జయ॥

సూర్యమండలాష్టకమ్

సమస్సవిత్రే జగదేకచక్షుషే జగత్ప్రసూతిస్థితినాశహేతవే। త్రయీమయాయ త్రిగుణాత్మధారిణే విరించినారాయణ శంకరాత్మనే॥ యన్మండలం దీప్తికరం విశాలం రత్నప్రభం తీవ్రమనాదిరూపమ్। దారిద్ర్యదుఃఖక్షయకారణం చ పునాతు మాం తత్సవితుర్వరేణ్యమ్॥1॥ యన్నండలం దేవగణైస్సు పూజితం విప్రైః స్తుతం భావనముక్తికోవిదమ్। తం దేవదేవం ప్రణమామి సూర్యం పునాతు మాం తత్సవితుర్వరేణ్యమ్॥2॥ యన్మండలం జ్ఞానఘనత్వగమ్యం త్రైలోక్యపూజ్యం త్రిగుణాత్మరూపమ్। సమస్త తేజోమయ దివ్యరూపం పునాతు మాం తత్సవితుర్వరేణ్యమ్॥3॥ యన్మండలం గూఢమతి ప్రబోధం ధర్మస్య వృద్థిం కురుతే జనానామ్। యత్సర్వపాపక్షయకారణం చ పునాతు మాం తత్సవితుర్వరేణ్యమ్॥4॥ యన్మండలం వ్యాధివినాశదక్షం యదృగ్యజుస్సామసు సంప్రగీతమ్। ప్రకాశితం యేన చ భూర్ఫువస్స్వః పునాతు మాం తత్సవితుర్వరేణ్యమ్॥5॥ యన్మండలం వేదవిదో వదంతి గాయంతి యచ్చారణసిద్థసంఘాః। యద్యోగినో యోగజుషాం చ సంఘాః పునాతు మాం తత్సవితుర్వరేణ్యమ్॥6॥ యన్నండలం సర్వజనేషు పూజితం జ్యోతిశ్చ కుర్యాదిహ మర్త్యలోకే। యత్కాల కల్పక్షయ కారణం చ పునాతు మాం తత్సవితుర్వరేణ్యమ్॥7॥ యన్మండలం విశ్వసృజాం ప్రసిద్థం ఉత్పత్తిరక్షాప్రళయ ప్రగల్భమ్ యస్మిన్ జగత్ సంహరతేఽఖిలం చ పునాతు మాం తత్సవితుర్వరేణ్యమ్॥8॥ యన్మండలం సర్వగతస్య విష్ణోః ఆత్మా పరంధామ విశుద్ధతత్త్వమ్। సూక్ష్మాంతరైర్యోగ పథానుగమ్యం పునాతు మాం తత్సవితుర్వరేణ్యమ్॥9॥ ఇతి శ్రీసూర్య మండలాష్టకం సంపూర్ణమ్

శ్రీ సరస్వతీ స్తోత్రమ్

యా కుందేందు తుషార హారధవళా యా శుభ్ర వస్త్రావృతా యా వీణా వరదండమండితకరా యా శ్వేతపద్మాసనా, యా బ్రహ్మాచ్యుతశంకరప్రభృతిభిర్దేవైః సదా వందితా సా మాం పాతు సరస్వతీ భగవతీ నిశ్శేషజాడ్యాపహా॥1॥ ఆశాసురాశీభవదంగవల్లీ భాసైవ దాసీకృత దుగ్థసింధుమ్। మందస్మితైఃనిందితశారదేందుమ్,వందేఽరవిందాసనసుందరి!త్వామ్॥2॥ శారదా శారదాంభోజవదనా వదనాంబుజే। సర్వదా సర్వదాస్మాకం సన్నిధిం సన్నిధిం క్రియాత్॥3॥ సరస్వతీం చ తాం నౌమి వాగధిష్ఠాతృదేవతామ్। దేవత్వం ప్రతిపద్యన్తే యదనుగ్రహతో జనాః॥4॥ పాతు నో నికషగ్రావమతిహేమ్నః సరస్వతీ। ప్రాజ్ఞేతరపరిచ్ఛేదం వచసైవ కరోతి యా॥5॥ శుక్లాం బ్రహ్మవిచారసారపరమామాద్యాం జగద్వ్యాపినీం వీణాపుస్తకధారిణీమభయదాం,జాడ్యాంధకారాపహామ్। హస్తే స్ఫాటికమాలికాం చ దధతీం,పద్మాసనే సంస్థితాం వందే తాం పరమేశ్వరీం భగవతీం,బుద్ధిప్రదాం శారదామ్॥6 వీణాధరే!విపుల మంగళ దానశీలే! భక్తార్తినాశిని!విరించి హరీశవంద్యే! కీర్తిప్రదే!ఽఖిల మనోరథదే!మహార్హ్! విద్యాప్రదాయిని!సరస్వతి!నౌమి నిత్యమ్॥7॥ శ్వేతాబ్జ పూర్ణ విమలాసన సంస్థితే!హే శ్వేతాంబరావృత మనోహర మంజుగాత్రే! ఉద్యన్మనోజ్ఞసిత పంకజ మంజులాస్యే! విద్యాప్రదాయిని!సరస్వతి!నౌమి నిత్యమ్॥8॥ మాతస్త్వదీయ పదపంకజభక్తియుక్తా యే త్వాం భజన్తి నిఖిలానపరాన్ విహాయ। తే నిర్జరత్వమిహ యాంతి కళేబరేణ భూవహ్నివాయు గగనాంబు వినిర్మితేన॥9॥ మోహాంధకారభరితే హృదయే మదీయే మాతః!సదైవ కురు వాసముదారభావే! స్వీయాఖిలావయవ నిర్మలసుప్రభాభిః శీఘ్రం వినాశాయ మనోగత మంధకారమ్॥10॥ బ్రహ్మా జగత్ సృజతి పాలయతీందిరేశః శంభుర్వినాశయతి దేవి!తవ ప్రభావైః। న స్యాత్ కృపా యది తవ ప్రకటప్రభావే న స్యుః కథంచిదపి తే నిజకార్యదక్షాః॥11॥ లక్ష్మీర్మేధా ధరా పుష్టిః గౌరీ తుష్టిః ప్రభా ధృతిః। ఏతాభిః పాహి తనుభిరష్టాభిర్మాం సరస్వతి!॥12॥ సరస్వత్యై నమో నిత్యం భద్రకాళ్యై నమో నమః। వేదవేదాంతవేదాంగ విదేయాస్థానేభ్య ఏవ చ॥13॥ సరస్వతి!మహాభాగే!విద్యే!కమలలోచనే! విద్యారూపే!విశాలాక్షి!విద్యాం దేహి నమోఽస్తుతే॥14॥ యదక్షరం పదం భ్రష్టం మాత్రాహీనం చ యద్భవేత్। తత్ సర్వం క్షమ్యతాం దేవి!ప్రసీద పరమేశ్వరి!॥15॥ ఇతి శ్రీ సరస్వతీ స్తోత్రం సంపూర్ణం