రత్న కింకిణికా రమ్య రశనా దామ భూషితా

రత్న కింకిణి కా రమ్య రశనా దామ భూషితా అను దివ్య నామము అమ్మవారికి శ్రీ లలితా సహస్ర నామావళిలో చెప్పబడ్డ ముప్పై ఎనిమిదవ పవిత్ర నామము. అమ్మవారు రత్నములతోను,చిరు గజ్జెలతోను మిక్కిలి రమణీయ మైన సువర్ణపు ఒడ్డాణం ధరించి,అలరారుతున్నది.ఆడవారు మొలనూలు,లేక ఒడ్డాణం ధరిస్తారు.అమ్మవారికి ఆభరణములకు లెక్కలేదు కదా!అన్నీ నవ రత్న ఖచిత సువర్ణాభూషణములే!అందులో ఈ ఒడ్డాణం అంచులకు నవరత్నములతో పొదిగిన చిరుగంటలు వ్రేలాడు తున్నాయి.ఆమె ఒడ్డాణం నాభి మీదుగా ఉంది. అమ్మ విరాట్ స్వరూపాన్ని ఒకసారి ఊహించుకుందాము.అప్పుడు నాభికి పైన ఊర్ధ్వలోకములు,నాభి క్రింద అధోలోకములు ఉన్నట్లు కాన వస్తుంది.ఆ రెండింటినీ ఈ ఒడ్డాణం అనుసంథానిస్తున్నట్లు అనిపిస్తుంది కదా!