కదంబ మంజరీ క్లుప్త కర్ణపూర మనోహరా

కదంబ మంజరీక్లుప్త కర్ణపూర మనోహరా అను అమ్మవారి నామము శ్రీలలితా సహస్ర నామావళిలోని అత్యద్భుతమయిన ఇరవై ఒకటవ నామము. అంటే అమ్మవారు కదంబ కుసుమాల గుత్తిని చెవుల పైభాగంలో ఒత్తుగా ధరించి మనోహరంగా, ధగధగలాడుతున్నది అని అర్థము రావి,తులసి,కదంబము,మారేడు,పారిజాతములను దేవతా వృక్షాలు అని అంటారు.ఇవి లక్ష్మీ ప్రదమయినవి.అన్నిటికంటే కదంబ కుసుమాలు అమ్మకు ప్రియమయినవి.కదంబ వృక్షము చెంత ఉండడం కూడా ఆమెకు ఇష్టం.అందుకే ఆమెను తరచూ కదంబ వన వాసినీ,కదంబ కుసుమ ప్రియా అని కూడా పొగుడుతుంటాము. అమ్మవారి చెవులు విశాలముగా,సుదీర్ఘంగా,పూలగుత్తులు మోయగలిగేటంత ధృఢంగా ఉన్నాయి.ఆమె కర్ణములు శ్రీకారముల వలెను,శ్రీకరములుగానూ ఉన్నాయి.అమ్మవారి కుడి చెవిని ఉ కారంతోనూ,ఎడమ చెవిని ఊ కారంతోనూ న్యాసం చేయవలెను.న్యాసము అంటే జప తపాలు చేసేటప్పుడు ఆయా అవయవాల వద్ద మంత్రాక్షరాలను ఉంచడం అని విశేషార్థము.